ब्लाक-मोहला मानपुर, जिला-राजनांदगाँव (छत्तीसगढ़) से राजेंद्र कोरेटी छत्तीसगढ़ी बोली में एक गीत सुना रहे है :
हाँसत गावत जीयत जावौ, पालव नहीं झमेला-
छोड़ जगत के मेला–ठेला, पंछी उड़े अकेला-
बड़े-बड़े मनखे मन आइन, पाइस कोन ठिकाना-
चार घड़ी के रिंगी चिंगी, तेखर बाद रवाना-
जइसन जेखर करम रहे वो, तइसन नाम कमाये-
पूजे जाये कोन्हों मनखे, कोन्हों गारी खाये-
कोन इहाँ का लेके आइस, लेगिस कोन खजाना-
जुच्छा आना सुक्खा जाना, का सेती इतराना-
माटी मा माटी मिलना हे, इही सत्य हे भाई-
बिधुना के आगू मनखे के, चलै नहीं चतराई-
कोट-कछेरी पाप-पुन्न के, माँगै नहीं गवाही-
बने करम के बाँध मोठरी, इही संग मा जाही...

ब्लाक-मोहल्ला मानपुर, जिला-राजनांदगाँव (छत्तीसगढ़) से राजेन्द्र कोरेटी छत्तीसगढ़ी भाषा में देशभक्ति गीत सुना रहे है :
भारत माता तोर,चरन के अमरित पीबो-
तन मन धन बल संग,देश के खातिर जीबो-
परन करत हन आज,तोर माटी ला छूके-
लाबो ओ सत् राज,बिना सुसताये रूके-
होही नवा बिहान,राज सुनता के आही-
जिनगी जाँगर चेत,सोझ रद्दा मा जाही-
भरही सबके पेट,सबो झन बने अघाहीं-
करके ओ परियास,सरग धरती मा लाहीं-
लालच भष्टाचार,मूड़ ला तोप लुकाहीं-
अपरिद्धा घूसखोर,आँख ला मूँद लजाहीं-
सत् भाखा सत् काज,सत्य मारग अपनाहीं-
जुग जिनगी के संग,मनुष मन बड़ हरषाहीं-
तोरे अन संतान,भटक गे हन ओ दाई-
होय समझ के फेर ,तभे माते करलाई-
दे दे ओ आशीष,चरन के पँइया लागौं-
अपरिद्धा पन छोड़,तोर सेवा बर जागौं-